Eguzki-erradiazio

Eguzkiak atmosferara erradiazio elektromagnetiko moduan igorritako energia da. Gainazal horizontal batean neurtzen da, piranometro edo erradiazio-sentsore baten bidez. Hegoaldera begira eta itzalik gabeko leku batetan neurtzen da, eta unitatea metro karratuko watt kopurua da (W/m² ).

Estazio meteorologikoetako bakoitzean neurtutako eguzki-erradiazioa POTENTZIA-unitatetan ematen da, metro karratuko wattetan (W/m²) hain zuzen ere. Hamar minututik behingo datuen kasuan, 10 minutuko batez besteko potentzia da, eta eguneko erradiazioaren kasuan, eguneko batez besteko potentzia adierazten du.

Hamar minututik behingo datuen kasuan POTENTZIA-unitatetan neurtutako eguzki-erradiazio globala ENERGIA- unitatetara aldatu nahi izanez gero, W/m²-tan emandako kopuru bakoitza bider 600 (10 minututan dauden segundoak) egin behar da, eta ateratzen den emaitza metro karratuko joule kopurua izanen da (J/m²). Eguneko batez besteko eguzki-erradiazio globalaren kasuan, emaitza metro karratuko jouletan lortzeko (J/m²), W/m²-tan emandako kopurua bider 86.400 (egun batetan dauden segundoak) egin behar da.

Argia, gizakiarentzako ikusgarria gertatzen den erradiazioa da. Bere uhin-luzera 400 eta 730nm bitartekoa da. 400nm-ren azpitik dagoen uhin-luzerako erradiazioari ultramorea deitzen zaio eta 730nm-ren gainetik dagoenari berriz infragorria.